काठमाडौं । सरकारले नेपाल प्रहरीको महानिरीक्षक (आईजीपी) मा मनोज केसीलाई नियुक्त गर्ने निर्णय गरेको छ। मंगलबार बसेको मन्त्रिपरिषद् बैठकले प्रहरी अतिरिक्त महानिरीक्षक (एआईजी) केसीलाई प्रहरी महानिरीक्षकमा बढुवा गर्ने निर्णय गरेको हो।

मन्त्रिपरिषद् बैठकले वर्तमान प्रहरी महानिरीक्षक दानबहादुर कार्कीलाई प्रधानमन्त्रीको विशेष सुरक्षा सल्लाहकारको जिम्मेवारी दिने निर्णयसमेत गरेको छ। सरकारको पछिल्लो निर्णयसँगै नेपाल प्रहरीको नेतृत्व परिवर्तन हुने भएको छ। प्रहरी संगठनको नेतृत्व सम्हालिरहेका कार्कीलाई प्रधानमन्त्रीको विशेष सुरक्षा सल्लाहकारको जिम्मेवारी दिएर केसीलाई प्रहरीको कमान्ड सुम्पिने सरकारको तयारी छ।

केसी यसअघि पनि प्रहरी महानिरीक्षकका प्रमुख दाबेदारमध्ये थिए। दानबहादुर कार्की आईजीपीमा नियुक्त हुँदा केसी प्रतिस्पर्धामा रहेका अतिरिक्त महानिरीक्षक थिए। मन्त्रिपरिषद्को निर्णयसँगै प्रहरी संगठनको नेतृत्व परिवर्तन र कार्कीको नयाँ जिम्मेवारी कार्यान्वयनको प्रक्रिया अघि बढ्नेछ।